موقف يدل علي اخلاق اشخاص مهذبون ,,,

الحمد لله رب العالمين


موقف يدل علي اخلاق اشخاص مهذبون
انا و واحد صاحبي كنا داخلين نتغدي في كنتاكي النهاردة
وكنا هانشتري وجبتين اكستريم الكبار
في طابور الكاشير .. كان قدامنا ست كبيرة من الناس الطيبين كدا .. ومعاها بناتها الاتنين 15 سنة و 7 سنين مثلا


ومنظرها غلبان جدا .. و شكلها دخلت كنتاكي بالغلط
بتقول للكاشيرة عايزة فراخ وشوية رز
الكاشيرة قالتلها هنا الفراخ بالقطعة يا ماما
قالتلها طيب انا عايزة قطعة واحدة
الكاشيرة بصتلها من فوق لتحت وقالتلها : ااقل وجبه فيها قطعتين و بستااااشر جنية يا حاجة
معاها رز ؟


لا .. لو معاها ريزو هاتبقي ب25 جنية
الست بصت بعين مكسورة على ال20 جنيه اللى في ايديها وقبل ما تتكلم
بنتها الكبيرة اللى كانت حاسه بيها .. لحقتها وقالت : مش لازم رز يا ماما ..انا مش جعانه اوي
انا وصاحبي بصينا لبعض بتأثر


الكاشيرة بتأفف : يلا يا حاجة علشان الطابور
الام ماعرفتش تعمل اية .. دفعت الفلوس للقطعتين..
واتصدمت لما شافت الطلب - طبعا هما مكانوش عارفين ان القطعتين في كنتاكي لا يسمنوا و لا يغنوا عن جوع -


المهم


احنا رحنا كلمنا المدير .. قدمنا شكوي في اسلوب الكاشيرة وقلنا اننا هانعزم الست على الوجبتين بتوعنا
المدير وافق .. وقالها انها كسبت وجبتين لانها الزبونة رقم 1000
الست وبناتها فرحوا جدا


واحنا خرجنا ضربنا ساندوتشات فول



--------
عارف اننا هانضيع الثواب لما نحكي القصة
لكن نتمني انها تكون الهام لناس كتير ..يعملوا كدا .. ودا الثواب اللى عايزينه
رمضان على الابواب


اشتري كيلو مانجا واديه لغلبان في الشارع
اشتري كانز بيبسي و اديه لطفل شوارع
انت كل يوم ممكن تحس انك شبعان
لكن مش كل يوم هاتحس انك انسان
كل سنة وانتم طيبيين