السلام عليكم ورحمة الله وبركاته
مع موقف شخصي للدكتور محمد الشافعي ,,
والصدقة وأثرها ,, خاصةً في الأيام الكريمة دي
كل عام وأنتم إلى الله أقرب وأدوم على طاعته
هقولكم على تجربة شخصية ,,
وأقسم بالله العلي العظيم دا حصل ,, ورب العزة
أنا مش بقولكم الكلام ده نوع من الخطب بتاعت الجوامع
لا لا لا ,,
إحنا شوفنا بعينا يا أولاد ,,
أنا كنت راجع من أمريكا مشحط ,, مفييييش
لأن أنا كنت بأخد 700 دولار في الشهر ,, وكان إيجار البيت 800 دولار
( كان بيتبعت من مصر 700 دولار دا المنحة ,, وكنت أنا بشتغل كمان عشان أكمل )
راجع مفييييييش ,, أبيض فُلة يعني
وخلصت الدكتوراة وراجل معاه رسالة الدكتوراة خالصة وزي الفل
وبعد ما وصلت بأسبوع ,,
نازل من البيت الصبح لقيت مراتي بتقولي : محمد فيه 20 جنيه في البيت بس
قولتله : يا نهار امممم ,, معلش اممم
قولت ,, هفوت على أي حد نستلف أي حاجة عشان نمشي الدنيا
على نبتدي ننزل الشغل التاني ,, ما لسه منزلتش الشغل
قولتلها : اديني بس خمسة جنيه يبقوا في جيبي منظر يعني
دكتور محترم يبقى معاه خمسة جنيه
وخدت فعلاً منها خمسة جنيه
وفاكر والله العظيم يا أولاد ,, أنا كنت نازل رايح مؤتمر Egyptian society of Cardiology
ودا كان معمول في الميريديان ساعاتها
وروحت ,, إديت محاضرة ,, اللي هي كانت رسالة الدكتوراة بتاعتي ,, ورجعت
كان فيه واحدة بتوقف عند الإشارة بتاعت القصر العيني ( عند المنيل )
ست غلبانة جداً كانت بتدي للدكاترة وردة الصبح ,, وإنت تديها اللي في جيبك
وكانت ساعات تيجي تديها فلوس ,, تقولك : أنا اكتفيت النهاردا ,, إدي الفلوس دي لواحد تاني غلبان
ست كانت طيبة جداً ,, وكانت بتسعى على يتامي ,, وإحنا كلنا عارفين كده كويس
فكلنا كنا بنحبها وبنديها يعني
فالمهم بعد ما أديت المحاضرة وراجع ,,
فلقيتها واقفة ,, دكتور محمد واحشني ,, وراحت مدياني الوردة
قولت : يا نهااااااار أسووود ,, أصل أنا معايا خمسة جنيه ,, هديهالها وأقولها إديني الباقي !!!
هعمل إيه !!! ولا أطنش ومديهاش حاجة
المهم ,, كان فيه صراع غير طبيعي ,,
في الأخر اتكسفت ,, وقولت : يا رب مش عايز الواحد يبقى منظره وحش
وروحت مديها الخمسة جنيه
طبعاً وأنا مروح كل رعبي ,, من مراتي ,, إنت عارف الستات ,, هقولها إيه !!
إديت الخمسة جنيه لواحدة غلبانة والبيت مفيهوش غير عشرين جنيه !!
أقسم بالله العظيم ده حصل ,,
كان معايا الموبايل اللي بنستخدمه غسالة بعد الظهر ,, اللي كان بإريال ,,
لما رجعت مصر ,, لقيت كل الناس معاها موبايلات ,, وأنا كان عندي الموبايل ده قبل ما أسافر
بس ممعيش فلوس أشتري واحد اللي هو من الأخر ,,
وحتى لما روحت بيه القسم ,,
النواب مسكوني قالولي : يا دكتور محمد هو الموبايل بجيب إذاعة مش عارف إيه
واللي يقولي : حضرتك ممكن تقلي عليه بيض ولا عادي !!!
اللي هو خُد تريقة براحتك
منا ممعييش
فلقيت الموبايل اللي معايا بيرن ,, وكان أول مرة يرن
فبرد ,,
فلقيت الأستاذ شريف مختار بيكلمني ,, إنت فيييييييين ( إيموشن متعصب )
قولتله : يا بيه مروح
قالي : لييييييييييه ؟؟!!!
هو إيه اللي ليه !!! أنا مروح ,, يا بيه أنا روحت إديت المحاضرة زي ما حضرتك قولتلي وراجع
قالي : لف وإرجع تااااااني ( إيموشن متعصب )
هو اللي قال الكلمة دي قبل علاء ولي الدين لف وارجع تاني
قولتله : ليه يا بيه ؟؟!!
قالي : عملوا المسابقة اللي هي أحسن محاضرة في المؤتمر وإنت كسبت 5.000 جنيه
والله يضاعف لمن يشاء
أقسم بالله ,, أنا أول ما شوفت الشيك ,, دمعت
وقعدت بيني وبين نفسي ,, بقى إنت يا حيوان كنت مستخسر في نفسك
إنت كنت مستخسر في نفسك ,, مش مستخسر في غلبان ,, لا ,,
لما مبتديش ,, إنت مستخسر في نفسك
إنت هيتردلك ,,
ربنا مش محتاجك أصلاً ,, دا إنت ربنا خلاك وسيلة يا بني آدم يا حمار
ربنا عايز يرزقك ثواب الصدقة ,,
الغلبان ربنا هيرزقه من غير ما يحتاجك ,,
ربنا عايز يرزقك بس إنت مش عايز
...
لما تكون عارف معلومة وتحاول توصلها لغيرك ,,
ربنا عايز يخليك تأخد ثواب
كده كده غيرك هتوصله المعلومة ,, فمتكسلش
كل سنة وإنتوا طيبين ,,
________
دكتور تفريغ
